Kasabay ng malakas na ulan ang pag-agos ng luha sa kanyang mga mata..
“Hindi. Hindi ito puwedeng mangyari!”
Lunes. Unang araw ng pasok ng mga estudyante sa eskuwelahan. Ngunit hindi sa eskuwela ang punta ni Lina, kundi sa opisina na pinapasukan ng kanyang nobyo. Dadalawin niya ito at sosorpresahin sana ngunit hindi sya pinapasok ng guwardiya sa lobby ng opisina ng kanyang nobyo. General manager ito ng isa sa mga sikat na ahensya sa Maynila.
Bigo si Lina.
“Hoy Lina, bakit wala ka na naman sa first subject natin kanina?” aniya ng kanyang bestfriend na si Tanya.
“May dinaanan lang ako kanina.” Pagsisinungaling niya.
“If I know, pumunta ka na naman dun sa boyfriend mo ano?”
Hindi na nakasagot si Lina. Mahal na mahal niya ang kanyang nobyo, mahal din naman siya nito, pero bakit minsan tila nararamdaman niyang may itinatago ang kanyang nobyo. Mag iisang taon na sila sa susunod na buwan at nakahanda na siyang ibigay ang kanyang sarili bilang regalo sa kanilang anibersaryo.
“Roy, mahal mo ba ako?”
“Oo naman Lina, mahal na mahal kita, lalo na ngayon na may nangyari na sa atin.”
Nakangiting natulog si Lina habang nakayakap sa kanyang nobyo.
Pagkalipas ng 3 buwan. Nagtataka si Lina sa kanyang mga nararamdaman nitong nakaraang araw. Bigla na lang nahihilo at bumabaliktad ang sikmura. Regular din ang kanyang buwanang dalaw, ngunit 2 buwan na siyang hindi dinadatnan. Napatutop siya.
Agad na nagpunta si Lina sa Makati para sorpresahin ang kanyang nobyo at ihatid ang magandang balita. Laking panghihina ng kanyang tuhod sa kanyang nakita.
“Kaya pala. Kaya pala…” Kaya pala kahit minsan hindi magawang maipakilala si Lina sa mga magulang ng kanyang nobyo dahil nakatali na pala ito. At may dalawang bunga pa!
Kasabay ng malakas na ulan ang pag-agos ng luha sa kanyang mga mata, pag-agos ng pulang tubig na nagmumula sa kanyang kamay hawak ang matalim na bagay na sanhi ng unti-unting pagtigil ng kanyang hininga.
